အာနန္ဒာဂူဘုရား

အာနန္ဒာဂူဘုရားကို ပုဂံခေတ် ကျန်စစ်သားမင်းကြီး လက်ထက် အေဒီ ၁၁၀၅ ခုနှစ်တွင် တည်ထားကိုးကွယ်ခဲ့ပြီး ဘုရား၏ဂုဏ်အရှိန်ဝါကြီးမား ကျော်စောခဲ့ပါသည်။ အံ့ဩရှုမောဖွယ် အနုပညာလက်ရာများကြောင့် လည်း အနုမှာအာနန္ဒာဟုပင် ပြောစမှတ်ပြုကြရသည်။ ဂူဘုရားကြီးကို တည်ဆောက်ထားပုံမှာ ပင်မအဆောက်အုံမှ အရပ်လေးမျက်နှာသို့ ကြက်ခြေခတ်ပုံစံ အာရုံခံမုခ် လေးခုကို  အထက်ပစ္စယံအဆင့်ထိ စေတီငယ်တစ်ဆူစီဖြင့် တည်ထားခြင်းဖြစ် ပါသည်။ ထိုစေတီငယ် များတွင် စေတီပုထိုးများ၏ အင်္ဂါရပ်တစ်ခုဖြစ်သော ထီးတော်တင်၍ ပူဇော်ထားပါသည်။ ဂူဘုရား အတွင်း၌ အရပ်လေးမျက်နှာသို့ မျက်နှာမူထားသော ရပ်တော်မူဘုရားလေးဆူတည်ထားပြီး ၅၅၀ ဇာတ်နိပါတ်တော်များဖြင့် ထွင်းထုထားသော စဉ့််ကွင်းများ၊ ပန်းတမော့များဖြင့် ဆင်ယင်ထားပါသည်။ ထို့အပြင် ဂူဘုရား၏ အတွင်းပိုင်းနှင့် အပြင်ပိုင်းတွင် ကျောက်ဆင်းတုတော်များကို ထည့်သွင်း တည်ဆောက် ထားပြီး မှတ်တမ်းများအရ အတွင်းပိုင်းတွင် ဆင်းတုတော်ပေါင်း ၁၅၀၀ခန့် ရှိသည်ဟု သိရှိရပါသည်။ အတွင်းဘက် ဝတ်ပြုဆောင်ရှိ နံရံများတွင် သမိုင်းဝင် နံရံဆေးရေးပန်းချီများစွာ ကိုလည်း တွေ့မြင်လေ့လာနိုင်ပါသည်။ ဂူဘုရားကြီးတွင် ပုဂံခေတ်၏ သမိုင်းကြောင်းရာဇဝင် များနှင့် ထိုခေတ်၏ အနုသုခုမလက်ရာများကို သမိုင်းဝင် ပြတိုက်သဖွယ် လေ့လာကြည့်ရှု နိုင်ပါသည်။