ဓာတ်တော်ချိုင့်ရေတံခွန်

ဓာတ်တော်ချိုင့် ရေတံခွန်သို့ တစ်ခေါက်မျှရောက်ဖူးလျှင်ပင် မပြန်ချင်လောက်အောင် နှစ်သက်မိမည် ဖြစ်သည်။ ရေတံခွန်မှ တသွင်သွင်စီးဆင်းနေသော သန့်ရှင်းကြည်လင်အေးမြနေသည့် စိမ်းပြာရောင် ရေများနှင့် အေးမြလတ်ဆတ်သော လေပြေညှင်းများ၏ တိုးဝှေ့တိုက်ခတ်မှုများကို ခံစားမိရုံနှင့် ဘဝအမောများပြေပျောက်ကာ နိဗ္ဗာန်ဘုံအလားခံစားရမည်ဖြစ်သည်။ အဆိုပါ ရေတံခွန်သို့ နှစ်စဉ် ပြည်တွင်း ပြည်ပ ခရီးသွားဧည့်သည်များ ထောင်နှင့်ချီကာ လာရောက် အပန်းဖြေလေ့ရှိပါသည်။ ဓာတ်တော်ချိုင့် ရေတံခွန်၏ ပတ်ဝန်းကျင်ရှိ နေရောင်ခြည်မမြင်ရသည်အထိ ပေါက်ရောက်လျက် ရှိသော စိမ်းညိုအုပ်မှိုင်းနေသည့် သစ်ပင်များ၊ ကျေးငှက်တိရိစ္ဆာန်များနှင့် ဇီဝမျိုးစိတ်မျိုးကွဲများစွာတို့က ခရီးသွားတို့၏ စိတ်အာရုံကိုဖမ်းစားလျက်ရှိသည်။ ဓာတ်တော်ချိုင့် ရေတံခွန်နှင့် သဘာဝတောတောင် အလှအပများကြောင့် စိတ်သာယာမှုကို ခံစားပြီးလျှင် အစဉ်အောက်မေ့သတိရကာ နောက်တစ်ကြိမ် လာရောက်လည်ပတ်လိုစိတ်များ ဖြစ်ပေါ်လာပါလိမ့်မည်။