ယူနက်စကို

တည်နေရာ

ပျူမြို့ဟောင်း (၃) မြို့ဖြစ်သည့် ဟန်လင်းမြို့၊ ဗိဿနိုးမြို့နှင့် သရေခေတ္တရာမြို့များသည် မြန်မာနိုင်ငံ တောင်ဘက်၊ အလယ်ပိုင်းနှင့် မြောက်ပိုင်းတို့တွင်တည်ရှိပါသည်။

သွားရောက်နိုင်သည့် နည်းလမ်းများ

ပျူမြို့များသည် အခြားမြို့များနှင့် လမ်းပန်းဆက်သွယ်ရေး ကောင်းမွန်သဖြင့် အငှားကား၊ ဘတ်စ်ကားများဖြင့် လွယ်ကူစွာသွားရောက်၍ မြို့၏အလှအပများကို ကြည့်ရှုခံစား နိုင်ပါသည်။ ဟန်လင်းမြို့သည် စစ်ကိုင်းတိုင်းဒေသကြီးတွင် တည်ရှိပြီး၊ ဗိဿနိုးမြို့သည် မကွေး တိုင်းဒေသကြီးနှင့်သရေခေတ္တရာမြို့သည် ပဲခူးတိုင်းဒေသကြီးတို့တွင် တည်ရှိပါသည်။  ပျူခေတ် ရှေးဟောင်းမြို့များ၏ သမိုင်းကြောင်းများကို သိရှိနိုင်မည့် အဓိကခရီးစဉ်လည်း ဖြစ်ပါသည်။

ယူနက်စကိုကမ္ဘာ့အမွေအနှစ်နေရာအဖြစ် သတ်မှတ်ခြင်းခံရသော ဟန်လင်းမြို့၊ ဗိဿနိုးမြို့ နှင့် သရေခေတ္တရာမြို့များသည် ဘီစီ ၂၀၀ မှ အေဒီ ၉၀၀ အထိ ထွန်းကားခဲ့သော ပျူနိုင်ငံတော်၏ ရှေးဟာင်းယဉ်ကျေးမှုမြို့များဖြစ်ပါသည်။ ရှေးအခါက တိဗက်-ဗမာ ပျူလူမျိုး များသည် တောင်ဘက်ပိုင်းသို့ ပြောင်းရွှေ့အခြေချ နေထိုင်ခဲ့ကြရာ ဧရာဝတီမြစ်ကမ်းနားသို့ ရောက်ရှိခဲ့ပါသည်။ ကျေးရွာများမှတစ်ဆင့်ခံတပ်များနှင့်ဗဟိုနန်းတော်များရှိသော မြို့များအထိ ဖွံ့ဖြိုးကျယ်ပြန့်လာခဲ့ပြီး မကြာမီ ထေရဝါဒဗုဒ္ဓဘာသာ ထွန်းကားလာခဲ့ပါသည်။ ယနေ့အချိန် တွင် ပျူမြို့များ၌ နန်းတော် အဆောက်အဦများ၊ နံရံအပိုင်းအစများကိုကြည့်ရှုခြင်းဖြင့် ပျူလူမျိုး များ နေထိုင်ခဲ့သည့် အထောက်အထား များကို လေ့လာမှတ်သားနိုင်ပါသည်။